ـ1ـ
أَحْلى وْجُوه وْجُوهْكُنْ.. وِاللَّيْل
مِنْهَا بْيَاخُدْ نُورْ نِجْماتُو
يَا شَعْب.. مَهْما تْجِنّ رِيح الْوَيْل
بِتْعَقِّلا قِضْبانْ أَرْزاتُو
ـ2ـ
مْنِ زْمانْ ناطِرْ يا حْبابْ الْقَلْب
إِحْكِيلْكُنْ عَنْ حُبّ أَضْنانِي
عَنْ نارْ لِمِّنْ بِالْحُروف تْهِبّ
بْيِرْعُدْ بِـ صَدْرِي صَوْت بُرْكاني
عَنْ مِجدلَيَّا الْـ طَلّعِتْ هَـ الشَّعْبْ
الْمِجدْلاوِي.. شَعْب إِنْساني
عَنْ أَرْز صَيَّفْ تَحْت مِنُّو الرَّبّ
بِبْلادْ.. ما بَدُّو لِها تانِي
عَنْ شَعْب صَدَّرْ مِن جْبالُو الْحُبّ
وْخَلاَّ الدِّني بِـ طَلّتو تِفْرَحْ
وْتِصرُخْ: يا أَهْلا بْشَعْب لُبْناني
ـ3ـ
جينا عَ غُرْبِه وِالدّمْع شلاّلْ
مَسْحِتْ بِـ إِيدَا دْمُوعْ حِرَّاقَه
وْصَارِت بِـ حِضْنا تْنَيِّمْ الأَطْفالْ
وْتِفْتَحْ بِـ وِجُّنْ لِلأَمَلْ طاقَه
وْصِرْنا بْحَنانَا نِضْرُب الأَمْثالْ
وْنِجْمَعِلْها مْنِ قْلُوبْنا باقَه
أُستْرالْيَا.. وْمِينْ غَيْرها بِالْبالْ؟
زَرْعِت شْعُوب الْكَوْن بِرْبُوعَا
وْقَطْفِتْ شَعْب مَجْبُول بِعْياقَه
ـ4ـ
بْلادْنا رَحْ تِرْجَع.. وْنِرْجَعْ
يا مِجدْلَيَّا.. وْيِفْرَح الْعُصْفُورْ
وْما يْضَلّ فِيها عْيُون عَمْ تِدْمَعْ
وْلا طِفْل يِفْزَعْ يِسِرْقُو الدَّيْجُورْ
وْكِل ما نْصَلِّي لْرَبّنا يِسْمَعْ
وْيُومِي بْإِيد مْشَعْشَعَه بِالنُّورْ
وِيْقِلّنا: لُبْنان مُشْ مَدْفَعْ
وْلا كِمْ عِصَابِه حاكْمِه بِالزُّورْ
لُبْنانْ مَجْدُو مْنِ السَّمَا بْيِنْبَعْ
وْرِيحِة تْرابُو بْرِيحة الْبَخُّورْ
لُبْنان فِكْر مْنِ الدِّنِي أَوْسَعْ
عَلَّمْ بِـ مَدْرِسْتُو طْفالْ زْغارْ
وْوَدَّى طْفالُو تْعَلِّمْ الْمَعْمُورْ
ـ5ـ
يا مِجْدلَيّا الصّامْدَه عَ طُولْ
يا ضَيْعِة الْـ مِنِّكْ أَمَلْنا طَلّ
يا مَجْد فَتَّح يَوْم دَقُّوا طْبُولْ
نَصْر الشُّعُوب الرَّافْضِه لِلذُّلْ
تا أُوصْفِكْ لِلنَّاسْ.. مُشْ مَعْقُولْ
وْشَمْس حُبِّكْ ضَاوْيِه عَ الْكِلّ!!
إِبْنِكْ.. حَبِيبِكْ.. صَيَّر الْمَجْهُولْ
وَاقِعْ.. وَقتْ ما صَارْ خَلْف الْبَحرْ
يْغَنّي الْجِبالْ الشَّامْخَه وِالسَّهْل
ـ6ـ
لُبْنانْ أَرْض الْكِلّ بَدُّو يْضَلّ
وِالْـ مُشْ عَ ذَوْقُو يْعَلِّقْ حْبالُو
مَهْما عَ طِرْقاتُو الرّجالْ تْقِلّ
بْأَرْض سِيدْنِي كِتْرِت رْجالُو
**
