ـ1ـ
مِنْ أَحْلى ضَيْعَه جَايِي
شَعْبَا مَحْبُوب وْإنْسانْ
مِتْل النَّجْمِه مْضُوَّايِه
مِنْ يَوْم الْـ كَوَّنْ أَكْوانْ
حْكايِتْها وَاللَّـه حْكايِه
لازِمْ تِحْكِيها الأَزْمانْ
إِسْما لِلْمَجْد مْرَايِه
وِبْقَلْبَا أَرْزِة لُبْنانْ
ـ2ـ
مِجِدْلَيَّا. حْرُوف الْمَجْد
وِمْمَجَّدْ إِسْما عَ طُولْ
مِنْ سَهْلا بِتْشُوف الْجُرْد
وْبَيْنا وْبَيْن الْجُرْد حْقُولْ
مِنْحِبَّا.. أَبّاً عَن جدّ
وِبْحُبَّا انْدَوْخِت الِعْقُولْ
مِجِدْلَيَّا.. جْنَيْنِةْ وَرْد
وْتا أُوصِفْها.. مُشْ مَعْقُولْ
ـ3ـ
غبِتْ عَنْها.. سْنِينْ سْنِين
دَعْسُوا حْدُود الأَرْبعينْ
وْما فارَقْنِي خْيالا يَوْمْ
زَيْتُونا.. الْحَوْر.. الشَّرْبينْ
لَيْلا حُبّ.. نْهارَا صَوْم
وْلِعْيُونا غَنُّوا حْسَاسينْ
بَخُّور كْنِيسِتْها دَوْم
مْعَطَّرْ جَنِّةْ قِدِّيسينْ
بْحبَّا.. وْما بْخاف مْنِ اللَّوْمْ
وْمِتْلِي بِيحِبَّا مْلايينْ
**
