ـ1ـ
أَللّه.. أَللّه عَ ضَيْعِتْنا
وْعَ النَّاسْ الْـ عاشُوا بْجِيرِتْنا
مْطانْيُوسْ أَنِيسِه وْوَديعَه
الْـ ضَوّوا بِالسَّهْرَه ضِحْكِتْنا
وْنَزْهَه.. فِي عِنْدا تِطْلِيعَه
مِتْل الأم اللي رَبِّتْنا
هِدْيِتْ لِلْعَيْلِه رَبيعا
وِالْجِيرِه الْحلْوِه هِدْيِتْنا
بْبِيع الْمَسْكُونِه وْما بْبيعَا
دكّانِه زْغِيرِه جَمْعِتْنا
وْسِتِّي تْضَوِّيلُنْ صَابِيعَا
وْتِفْرَح فِيهُنْ دكّانِتْنا
ـ2ـ
أَللّه.. أَللّه عَ لُوسِيَّا
وْإِبْنا مِيشال اللي بْحبُّو
رِفْقَه كنَّا بْمِجِدْلَيَّا
وْشُو بْيِحْلالي إِمْشِي بْدَرْبُو
وْمَنِيرَه تْغَنِّي الْمُولَيَّا
وِطْيُور الضَّيْعَه يِنْطِرْبُوا
إِبْنا رْفِيقي تِرْفَعْ دَيَّا
وْأَنْطوان مْعَرْبَط بِـ كتْبُو
وْبُو الْعِيسْ اللّي بْصَوْتُو تْفَيَّا
أَوْتارْ.. اشْتاقُوا يِنْضِرْبُوا
لِلْغِنِّيِّه: إِمَّا وْبَيَّا
فَنَّانْ.. وْيِقْبِرْني رَبُّو
ـ3ـ
بِتْذَكَّرْ غُورُو وْكَمُّولا
وْنَجِيبِه وْحَنَّا سلْطانِه
وْرُوزَا.. تِتْشَاوَفْ بِـ طُولا
وْعَلْيَا.. بْقَامِتْها الْمِلْيَانِه
فْرُوسين الْكِلْمِه الْـ بِتْقُولا
بْتُوقَعْ بِالدَّيْنِه حِرْزَانِه
جِيرِه.. غَنِيِّه بِعْقُولا
يا أَللّه بَارِك جِيرَانِي
ـ4ـ
بِتْذَكَّرْ سَرْكِيس الْحَتِّي
وِالْعَبايِه الْـ فَوْق كْتافُو
يِمْرُق.. يْصَبِّحْها لْسِتِّي
وِالسِّيكارَه بْلَوْن شْفافُو
بِتْذَكَّرْ بَيّاعْ الْمُقْتِي
وْكَوْكَبْ تِنْدَهْلُو ما تْخافو
عِنْدُو هَيْئَه بِشْعَه مْرِتِّه
مِتْل اللّي مْلَفْلَف بِلْحافُو
ـ5ـ
بِتْذَكَّرْ مَارِي مَنْصُورْ
الْـ حِمْلِتْنِي عَ دَيَّاتا
تْغَنِّجْنِي متْل الْعُصْفُورْ
وْبَعْدِي بِحْلُف بِحْيَاتَا
بِتْذَكَّرْ هَاكْ التَّنُورْ
وْحَنِّه وْرِيحِةْ خِبْزاتا
وْخُوري يِغْرَقْ بِالْبَخُّورْ
وْفَدْوَى تْضَوِّي شَمْعاتَا
جوزافْ لِلْعَدْرا مِنْدُورْ
وْلازِمْ تُوفِي نْدُوراتا
ـ6ـ
بِتْذَكَّرْ بَدْوِي خُطّارْ
كِيفْ يْلَحِّمْ تَنْكاتُو
وْما بِنْسَى الْيَاس الْمُخْتارْ
وْهاك السِّحْر بْحَكْياتُو
وْسُوزانْ الِبْعَيْنِي.. تِحْتارْ
كِيفْ الشِّعْر وْأَبْياتُو
لَفُّوها بْأَحْلَى زنَّارْ
بْلَوْن عْيُونا وَرْداتُو
وْمُوسي أَنِيسِه هَـ الْجارْ
الشَّمْس بْتِعْشَقْ طَلاَّتُو
وماري مَرْتُو سِتّ الدَّارْ
رَبِّتْ أَحْلَى زَهْراتُو
وْبَتْرُونَلَّه.. قَلْبَا نارْ
سَرْكِيس طَوَّلْ بَرْماتُو
حَدَّا سِتّ وْلاد زْغارْ
وْتاجْ راسَا.. هُوِّي بْذَاتُو
كْتارْ اللِّي بْجِيرِتْنا كْتارْ
وْمَحْرُوقْ قَلْبِي عَ الْماتُوا
**
