ـ1ـ
كِيفْ تْرَكْت هاك الْعَيْن
الْـ مَيِّتْهَا بْلَون الْمَيْرُونْ
عَيْن الضَّيْعَه بْمِزْرابَيْن
غِرْقِت بْجُرْنا الِعْيُونْ
وْزَارُوبْ قَطْفَا.. الْـ ضَايِعْ بَيْن
اللَّيْمُون وْحَبّ الزَّيْتُون؟
خَيْر.. وْتاكِي عَ الْمَيْلَيْن
وْيَا مَارِق عَبِّي الِبْطُونْ
ـ2ـ
كِيف تْرَكْت الطَّواحِينْ
الْـ سُكَّرها حَلَّى الأَيَّامْ
طْوَاحِينْ السُّكَّرْ.. تِخْمِينْ
ناطِرْتَكْ.. تا فِيهَا تْنامْ؟
وْسَبِيل زْيادِه.. مِسْكِينْ
كانْ يْزَرْزِبْلَكْ أَحْلامْ؟
كِيفْ تْرَكتُو.. وْغُبْت سْنِينْ
وْعارِفْ عَ غْيَابَكْ مِنْضَامْ؟
ـ3ـ
كِيف تْرَكْت بْيَادِرْ مَجْد
وْسَافَرْت.. وْجُرْحَكْ بِينِزّ
بَعْدُو تْرَابُو ناطِرْ بَعْد
صَابِيعَكْ.. فَوْقُو تِنْهَزّْ؟
وِكْنِيسِه قْطَعْتِلاَّ وَعْد
تْزَنِّرْها بِبْيَارِقْ عِزّ
كِيفْ تْرَكْتَا وْهِيِّي السَّعْد
وْهِيِّي كَنْز الْـ بَدُّو كَنْز؟
ـ4ـ
كِيف تْرَكْت الدُّكانِه
الْـ سِتَّكْ عَطْيِتْها عُمْرَا
خَيْر وْبَرْكِه مِلْيانِه
بْتِنْقَصْها الضِّحْكِه السَّمْرَا؟
خْرِسْتِين سِتَّكْ سَهْرَانِه
وْبِالْمَوْقد جَمْرَه حَمْرَا
بَدَّا قِصَّه حِرْزَانِه
تا بْقَلْبَا تْطَفِّي الْجَمْرَه
ـ5ـ
كِيفْ تْرَكْت؟ وْكِيفْ مْشِيتْ؟
وْلَيْش تْأَخَّرْت وْما جِيتْ؟
بْشِعْرَكْ.. ياما وْياما رْجِعْت
عَ الأَرْض.. وْبِالْغُرْبِه بْقِيتْ
فِيكْ تْقِلّي شُو جَمَّعْت
وْمِن بَعْد الشَّيْبِه شُو جْنِيتْ؟
أَحْلَى أَيَّامَك ضِيَّعْت
بْغُرْبِه.. مَزْرُوعَه تْوابِيتْ؟!
ـ6ـ
يا مِجِدْلَيَّا.. الْهُجْرانْ
خَلاَّنِي حبِّكْ أَكْتَرْ
وْغَنِّي شَعْبِكْ هَـ الإِنْسَانْ
الْـ أَكْبَرْ مِنْ شِعْرِي أَكْبَرْ
خَبِّيلُو بْقَلْبِي الْقُصْدانْ
تا يْغَارُوا وْرَاقْ الدَّفْتَرْ
شَعْبِكْ.. أَرْزِه مِنْ لُبْنانْ
غْصُونَا فَيِّتْ عَ الْمَهْجَرْ
**
